2009年9月4日一歲啦! 我買左個好靚的蛋糕慶祝bb一歲生日, 呢晚就叫左pizza同kfc同屋企人一齊慶祝, 睇下, 個蛋糕係咪好靚呢!!

生日願望好簡單, 希望bb身體健康...當然仲希望佢將來都開開心心, 出入平安, 聽教聽話, 唔好學壞, 精乖靈利...(下刪一百字)

好啦, 究竟境襄而家一歲識d乜呢?!

體重: 約24磅左右 (12號去健康院, 到時再update正確數字)

身高: 約80cm

牙仔: 7個半月出第一隻下門牙, 9個月出第2隻下門牙, 之後好快再出第一隻上門牙. 我諗約10個幾月左右出埋第2隻上門牙同第3隻下門牙. 一共出左5隻後到而家都冇進展啦.

頭髮: 依然好似Q太朗咁多頭髮. 我d fd個b已經剪過幾次頭髮, 但我家襄兒到而家一歲依然保持清爽, 堅持慢增長, 距離剪頭髮既路仲有一大段囉!

行路: 約10個月左右就開始成日想行路, 但完全企唔穩, 所以我地嗰時成日要雙手捉住bb隔肋底扶佢行, 最辛苦嗰段時間, 真係腰酸背痛. 到11個半月時已行得穩好多, 只需拖住bb一隻手就可以了. 同時, bb呢刻都開始可以唔駛人扶自己企幾秒. 到而家已可以自行行幾步了! 估計13個月前應該可以自己行!

動作: 識拜拜 (但識左之後就唔肯再做呢個動作, 玩性格...), 識請請, 而家係狂請請, 但多數雙手唔係合埋, 係兩隻手一齊上下狂擺動, 勁做呢個動作! 開始識拍手同飛吻, 但飛吻會變左食手指...

說話: 約8個月定9個月識叫baba mama, 但堅持唔肯叫公公婆婆等人....而家狂講bb話, 如da ba da ba dad, 打de (勁似叫daddy)....仲有乜呢...唔記得添.

認人: 唔知幾時開始識認, 總之而家問bb公公呢? 婆婆呢? 姨姨呢? 舅父呢等等, 都識得即刻望向有關人士.

痴身度: 最痴婆婆, 一見婆婆就即刻撲埋去. 第二先係我呢個阿媽 >_<. 第三個爸爸.

食物: 一歲啦, 依然飲媽媽奶, 我終於完成我的目標! 好開心! 往後會點未知....或許順其自然啦. 其餘就主要食粥仔, 糊仔等.

暫時諗到咁多啦....諗到多d再update!

(閱讀全文)

雖然病左, 不過境襄都算幾精神, 食得玩得, 只係間中都會特別扭下計, 要貼退熱貼啦~

我呢個渣豆媽媽真係渣, 竟然俾bb傳染番, 復活節後第一日番工開始發燒, 第2日就請假係屋企休息下, 休息一日以為冇事咪第二日再番工囉, 點知番工嗰日下午就再度發燒啦, 又要再休息過, 如是者以為冇事咪星期六番長週囉, 我真係身子弱(但又唔係財多嗰隻), 星期日第三度發燒, 好辛苦, 再加上勁咳兼狂流鼻涕, 非常辛苦, 從未試過病咁耐兼番兜發足成個星期燒.

(閱讀全文)

食腳指...

係咪好hip hop?!

好嘆...

食蘋果, 幾多人捉住我對手!

好enjoy~~

cap帽

食左西蘭花蓉, 你覺得似乜....

ee...污糟貓

肥美的雞脾

好開心去公園玩

嘻嘻嘻

做乜伸脷?

表哥好勁, 抱住表弟, 表姐又一齊影相, 好warm呀~

坐得好舒服呀~

(閱讀全文)

好, 首先報告一下境襄的生長情況先:

體重: 而家約20磅左右啦, 喺6個月時健康院度到19磅, 生長線大約在90線左右, 唔錯幾好! keep住落去呀! 媽媽之前番工日日抱住境襄去婆婆屋企, 好早已經抱到勁辛苦, 終於喺6個月左右要用車仔啦, 舒服晒~

身長: 6個月度時有74cm長, 係over左97線, 即係100個bb裏境襄係最高嗰三兩個! 睇黎係遺傳左爸爸媽媽既高度啦, 第時會唔會有6呎高呢?!

主餐: 而家都係食媽媽奶為主, 冇食奶粉, 如果有睇開我之前的blog, 就知道我當初的人奶辛酸史, 時間証明我的努力同堅持係冇白費的! 好多人成日問我餵到幾時, 我答目標係1歲, 1歲後就到時先算了, 個個聽完都話我勁咁有恆心, 其實飯唔識煮的我, 湊仔都麻麻地識的我, 只係俾到我有既奶俾bb, 並唔係乜野勁, 我只係好有決心囉. 而且當我睇baby kingdom的forum時, 我呢d真係小巫見大巫, 佢地好多人都餵到bb兩三歲自然離乳, 我自問應該冇咁既恆心! 對於自己餵過左6個月, 已經好心滿意足了, 希望成功餵到最少1歲.

次餐: 而家已經俾糊仔粥仔境襄食啦, 境襄最鍾意食香蕉糊仔, 次次食到唔停咁! 另外我地有整過蘋果糊仔, 蛋黃糊仔, 南瓜粥仔, 蕃茄粥仔, 瘦肉粥仔咁, 境襄就對呢d一時時啦, 生果糊仔佢肯食, 其他粥仔就睇心情, 有時肯食晒, 有時只食幾啖! 境襄快d食到2餐粥仔代替人奶的話, 做媽媽的我就會越來越輕鬆!

牙仔: 到而家仲未出牙仔, 不過成日會咬野同勁流口水! 買左好多條口水肩啦~

笑聲: 已經成日keke笑, 我地成日引境襄笑, 因為佢如果開心keke笑的話, 我地聽得都會好開心!

發音: 有時都會發d類似mama baba dada的叫聲, 我覺得佢未真係識叫baba mama, 只係發音咁岩差唔多! 境襄你快d識叫mama, 記得要識叫mama先!! 嘿嘿

身體郁動: 已經識360度轉身, 最鍾意係換片時郁來郁去, 或者下身赤條條咁轉來轉去, 搞到條片成日都歪晒!! 腳仔已經好硬淨, 成日扶住佢行, 但當然未可以自己行到, 都未識得爬呢.

眼神: 最鍾意見到陌生人時超級眼定定望住人, 眼都唔眨, 抬頭定鏡望住, 好搞笑!

(閱讀全文)

之前呢2個月, 通常夜晚去完麻麻/婆婆屋企食完飯番屋企, 我都要餵奶同抱b氹佢瞓, 大約12點左右先可以做自己野, 沖得涼黎搞下呢樣搞下嗰樣就點幾兩點先瞓, 一晚大約瞓四五個鐘. 如果番工都係咁既節奏, 我真係會頂唔順, 希望bb乖d, 放落床唔好成日喊, 咁我就輕鬆好多!

後日就番工, 昨日去健康院上磅, oh no~ 重有成十斤肉喺身! 但我有bb前都已經肥左好多, 如果要keep番昔日的重量, 就要喊去十几斤肥豬肉先得! 不過餵人奶冇得減肥, 減左就會唔夠奶, 重要食多左好多野, 我而家有得身體自然瘦, 希望快d瘦番啦, d褲全部唔岩著, 我番工諗住著番條唔多覺係大肚褲的大肚西褲算啦, 費時買, 因已好難再買到岩我的size lu!!

(閱讀全文)

點知前晚無端端3點幾醒左要飲奶, 5點幾又醒一次飲奶!!   唔好呀bb~~ 明明介左夜奶架, 唔好又好似初生咁飲番呀!! 昨晚就好d, 5點幾先醒. 希望黎緊都可以瞓到7個鐘先醒要飲奶啦! 如果唔係下星期我開始番工就好辛苦架啦!!

昨日開始當番左工咁泵奶俾bb飲, 唔埋身餵, 因為bb同我要實習了. 本來plan每3個鐘泵一次, 但發覺原來好難, 本來預左幾點開始座熱支奶, 點知bb提早肚餓, 趕唔切座熱, 改左埋身餵, 咁就呢餐泵唔到, 同埋由於得我一個睇住bb, 有時剛剛想泵奶, bb又喊緊, 真係分身不暇, 所以昨日勉勉強強泵左2次.

今日就好d啦, 時間預得好左d, 可以泵到3次奶, 但係就隔左3.5小時先泵一次, 因為每次泵奶時, bb又係咁岩喊緊, 明明飲完奶都喊, 肯定係扭計扭抱! 不過我而家抱bb都習慣左, 所以可以邊抱邊泵! bb都幾搞笑喎, 我個電泵都幾嘈, 本來bb喊緊, 我開電泵咁嘈佢反而靜左, 之後仲瞓著左! 哈哈, 仲好, 咁我可以專心泵奶.

(閱讀全文)

如之前個blog所講, 喺bb第1個月時, 我湊b湊得好辛苦. 媽媽會拎早午飯俾我我, 同埋幫bb沖涼, 而其餘時間就得我一個對住bb, 我都覺得自己好叻, 以前完全唔識湊bb, 抱又唔識抱, 換片都唔識, 而家竟然係自己湊!! 哈哈, 冇他, 煮到埋黎都要食! 所以每當我好累好辛苦時, 我都會sms俾我的朋友發洩一下!

不過, 身邊亦有朋友的bb健康未太理想, 需要做手術, 做父母的見到自己bb要受咁多痛苦, 真係好心痛. 之前報紙報導過一個孕婦因為飲含有三聚氰氨的牛奶而生了畸胎, 我自己好愕然, 愕然的原因係因為呢個孕婦竟然係我認識的, 我地未生之前仲成日傾大肚經. 突然間感覺好近, 非常為呢位媽媽難過. 亦有d好想生bb, 終於有bb但最後小產左. 原來生一個健健康康的bb唔係咁容易, 亦唔係必然的, 我好慶幸自己生左一個好健康的bb, 我希望bb將來都少病少痛, 最好無病無痛, 所以我盡我能力以人奶餵bb, 希望bb能夠健康成長.

(閱讀全文)

小朋友真係大得快, 眨下眼jeffy同雍融已經咁大個啦, bb你大個左又會係點架呢??

bb眼瞓準備瞓時, 成日會反白眼, 又俾我捕捉到佢反白眼啦!!嘿嘿...

bb而家已經6w4d啦, 小朋友大得好快, 好多人話bb個樣不停變緊, 我日日對住bb, 最大感覺係bb重左好多! 尤其是餵奶或抱bb出街時, 手臂幼d都斷! 我諗假以時日, 日子有功, 我既手臂都會變左麒麟臂!!

我呢個bb好大力, 好多抱親bb都話佢人仔細細好大力, 成日踢踢踢! 今日bb竟然識得自己由平瞓90度角轉左側身瞓呀! 好勁~可惜我趕唔切影番張相! 個半月人仔已經開始識側身, 相信唔駛幾耐就識得反身啦, 我要加倍留意先得!

好啦, 等我又post bb的近照, bb個樣係咪又變左呢??

bb條脷好多"奶苔", 哈哈

又喊啦又喊啦!!

又伸脷?!

同monchichi一齊影番張相先

抱抱下瞓著左....個鼻仲有粒鼻c添...

出世4/9: 3.475kg (7.6lb)
12/9: 3.6kg
13/9: 3.59kg
16/9: 3.68kg
26/9: 4.2kg
6/10: 4.63kg
14/10: 5.06kg (11.1lb)

bb重得幾好哦! 而家都成11磅幾, 比出世重左接近4磅, 唔錯唔錯!

人奶b食得夠唔夠最緊要睇重量同埋每日濕片夠唔夠, bb重量都發展得理想, 而家每日濕片都好夠, 咁就放心晒啦!!

不過, bb你快d食得穩定d啦, 最好定時3個鐘先食一次, 咁媽媽就冇咁辛苦啦!

捱到12朝終於可以洗頭啦, 太霖形容我d頭髮為"一餅野", 哈哈, 因為真係成餅野咁! 之後我媽又問左大陸d鄉里, 又話唔應該12朝咁快洗喎, 要過成個月先得!! 所以叫我12朝後唔好洗住, 直至滿月為止! 嘩...咁即係仲有成十幾廿日?! 哈...我自己都估唔到呀, 你話我迷信又好點都好, 我唔想老來頭痛或風濕, 我真係忍到滿月前一日先洗頭呀!! 幾堅呀! 即係成個月只洗左2次咁大把, 你話我既忍耐力係咪超強呀!!

12朝時洗頭要洗2次洗得, 第1次完全冇泡, 我諗太多頭油啦, 哈哈! 滿月前一日我洗左3次! 因為成十幾廿日, 洗3次先安心, 終於我"餅"頭髮變番"秀髮"啦! 哈哈!

(閱讀全文)

奶媽條路好難行, 我一開始已選擇左個奶媽餵人奶, 我好希望可以全人奶最少一年, 初生第一個月係奶媽最辛苦既時期, bb一喊就要餵, 不分晝夜, 但係而家bb都差唔多滿月啦, 飲奶pattern應該會穩定少少, 點解bb仲係咁唔定時呀..?

每次餵奶時間都好長, 有時半個鐘, 有時超過成個鐘添! 因為bb成日飲飲下奶瞓著左, 又要叫醒bb飲. 叫唔醒就放落床瞓, 點知隔一陣又喊, 又要餵過, 如是者, 每日不斷重覆做呢個動作好多次. bb雖然有時喺到啜啜啜, 但我發覺bb好似當左係奶咀, 唔係飲緊奶. 我唔俾佢啜, 佢就郁身郁世, 又開始扭計要喊, 我都冇晒乎, 唯有俾bb再啜過. 有時連續幾個鐘都係咁, 一直抱住佢俾啜, 又唔肯瞓, 真係人都顛!

做奶媽比奶粉媽多d憂慮, 因為埋身餵的話, 根本唔知bb飲左幾多奶, 每次bb喊, 就諗究竟係咪bb食唔飽呢? 係咪我唔夠奶俾bb呢? 咁點算呢, 心底裏有一絲念頭諗要唔要補奶粉... 有時真係好炆, 忍唔住鬧bb, 希望bb可以乖d, 又試過打bb屁股, meet bb塊面以作發洩. 好似好殘忍咁, 對一個初生bb已經要體罰, 但我真係忍唔住啦! bb, 媽媽真係好累好累啦, 你乖d啦! 你究竟係唔飽, 定係扭計要抱要食奶咀? 可唔可以話俾我知?!

(閱讀全文)